اليوتيوبرز و صناع المحتوى عاونو ف وصول الرّاپ المغربي

الرياكْتورز والreviewers ولاو دابا قوّة مايمكنش نتجاهلوها فالساحة ديال الرّاپ المغربي. دورهم كبير و مهم، كيعطيو للأغاني فرص توصل لجمهور أوسع و أكبر . صناع محتوى بحال Youssef Boushaq، Mehdi Scott، Sofia VATO، وreviewers بحال 3ab9or l7ma9 reaction، Raw Soueelt، Khibra، Familya وناس آخرين، كلهم كيعاونُو فهاذ التوسيع، وخاصّة باش الموسيقى توصل للناس داخل وخارج المغرب، وحتى كتساعد فهدم الحواجز اللغوية. هاد الشهرة كتترجم مباشرة لأرقام رقمية مهمة: كترفع الترافيك فصفحات الفنانين، كتكبر عدد المشاهدات والاستماعات، وكتخلي الأغاني يبانُو أكثر فخوارزميات اليوتيوب والمنصّات الأخرى. و ماشي غير ف الأرقام، هاد الناس ولاو كايأثر ف الذوق العام الحديث. الرأي ديالهم والتحليلات اللي كيديروها للaudience ديالهم الوفيّ تقدر تْحول أي فنان لفنان محبوب، تخلق عليه البوز، أو حتى تطيح ليه التفاعل معاه، وبهذا كيخلقو بشكل كبير التصوّر العام عند الناس، ويمكن نمشيو بعيد و نقولوأنهم ولاو كيوجهو شنو الناس كيسمعو.